Azərbaycan Respublikasının Konstitusiyası

Yerlərdə özünüidarənin təşkili

I. Yerli özünüidarəni bələdiyyələr həyata keçirir.

II. Bələdiyyələr seçkilər əsasında yaradılır.

III. Bələdiyyələrin statusunun əsasları bu Konstitusiya ilə, bələdiyyələrə seçkilərin qaydaları isə qanunla müəyyən edilir.

Bələdiyyələrin işinin təşkili

I. Bələdiyyə öz fəaliyyətini iclaslar, daimi və başqa komissiyalar vasitəsi ilə həyata keçirir.

II. Bələdiyyənin iclaslarını bələdiyyənin sədri çağırır.

Bələdiyyələrin səlahiyyətləri

I. Bələdiyyələrin iclaslarında aşağıdakı məsələlər həll edilir:

1. bələdiyyə üzvlərinin səlahiyyətlərinin tanınması, qanunla müəyyən edilmiş hallarda onların səlahiyyətlərinin itirilməsi və səlahiyyətlərinə xitam verilməsi;
2. bələdiyyənin reqlamentinin təsdiq edilməsi;
3. bələdiyyə sədrinin və onun müavinlərinin, daimi və başqa komissiyaların seçilməsi;
4. yerli vergilərin və ödənişlərin müəyyən edilməsi;
5. yerli büdcənin və onun icrası haqqında hesabatların təsdiq edilməsi;
6. bələdiyyə mülkiyyətinə sahiblik, ondan istifadə və onun barəsində sərəncam;
7. yerli sosial müdafiə və sosial inkişaf proqramlarının qəbul və icra edilməsi;
8. yerli iqtisadi inkişaf proqramlarının qəbul və icra edilməsi;
9. yerli ekoloji proqramların qəbul və icra edilməsi.

II. Bələdiyyələrə qanunvericilik və icra hakimiyyətləri tərəfindən əlavə səlahiyyətlər verilə bilər. Bu səlahiyyətlərin həyata keçirilməsi üçün müvafiq maliyyə vəsaiti ayrılmalıdır.

Bələdiyyələrin qərarları

I. Bələdiyyənin iclaslarında baxılan məsələlərə dair qərarlar qəbul edilir.

II. Bələdiyyənin qərarları bələdiyyə üzvlərinin sadə səs çoxluğu ilə qəbul edilir.

III. Yerli vergilər və ödənişlərlə bağlı qərarlar bələdiyyə üzvlərinin üçdə iki səs çoxluğu ilə qəbul edilir.

Bələdiyyələrin müstəqilliyinin təminatı

I. Bələdiyyələr öz səlahiyyətlərini həyata keçirməkdə müstəqildirlər. Bu, bələdiyyə ərazisində yaşayan vətəndaşlar qarşısında onların məsuliyyətini istisna etmir.

II. Bələdiyyələrin öz səlahiyyətlərini müstəqil həyata keçirməsi Azərbaycan dövlətinin suverenliyinə xələl gətirə bilməz.

III. Dövlət bələdiyyələrin fəaliyyətinə nəzarət edir.

IV. Qanunla müəyyən edilmiş hallarda və qaydada bələdiyyələr öz fəaliyyətləri barəsində Azərbaycan Respublikasının Milli Məclisinə hesabat təqdim edirlər.

V. Bələdiyyələrin məhkəmə tərəfindən müdafiəsinə, dövlət orqanlarının qərarları nəticəsində yaranan əlavə xərclərinin ödənilməsinə təminat verilir.

Bələdiyyələrin məsuliyyəti

Bələdiyyələr və bələdiyyə qulluqçuları qanuna zidd hərəkətləri və ya hərəkətsizliyi nəticəsində insan hüquq və azadlıqlarına dəymiş ziyana, habelə onların təminatının pozulmasına görə qanunla müəyyən edilmiş qaydada mülki məsuliyyət daşıyırlar.

Bələdiyyə aktları

I. Bələdiyyələrin qəbul etdikləri aktlar hüquqa və haqq-ədalətə əsaslanmalı, Azərbaycan Respublikasının Konstitusiyasına, qanunlarına, Prezidentin fərmanlarına və Nazirlər Kabinetinin qərarlarına zidd olmamalıdır.

II. Bələdiyyələrin qəbul etdiyi aktların icrası onların ərazisində yaşayan vətəndaşlar və həmin ərazidə yerləşən hüquqi şəxslər üçün məcburidir.